Friday, April 13, 2007
اديها كمان شرعيه
اديها كمان شرعيه


النهارده ممكن نسميه الاربعاء الاسود المهبب
محدش يقولي تشاؤم بقي
ليه يا عم في ايه
مجلس الشوري وافق علي تعديل قانون الاحكام العسكريه
والي مش عارف التعديل هيبقي ايه يعني هيعملوا استئناف للقضاء العسكري

وهو ده وحش يا غبي ده نعمه وحلت علينا

اقولك يا سيدي بقي الي فيها


عمك الرئيس محمد حسني مبارك عارفه ؟؟


الي قاعد في القصر بتاع الرئاسه ده الي بيطلع في الاخبار ؟؟

اه اه ساعات بشوفوا


الوقتي يا سيدي ممكن يحول اي حد لمحاكمه عسكريه لما يطبقوا قانون مكافحه الارهاب او حتي من غير ما يطبقوه مهو شغال

والله العظيم بتتكلم جد

ايوا يا عم مهو كده ممكن يجيبوك من سريرك ويقولوا عليك ارهابي ويحولوك محاكمه عسكريه وبعدين يقولك احنا هنكفلك حق انك تستأنف الحكم القضائي العسكري

وحياه ابوك ؟؟ ارهابي زي بن لادن والعالم دي

يا عم ادعي بس انهم يخلوك زي بن لادن علي الاقل هتبقي متسيط انما انت هتتعلق من رجلك ويكهربوك وهيروقوك علي الاخر

طيب استئذن انا بقي كنت بخلص اوراق سفري هروح اشوفها جهزت ولا لاء انا قلت من الاول مليش عيش في البلد دي


الحوار اعلاه ليس مختلق بل هو حوار حدث في الواقع وللاسف سيحدث كل يوم

فنحن الان اصبحنا ندعم الحريه وليست اي حريه حريتنا هي

حريه الحكومه في انتهاك اعراض المواطنين
حريه السلطه في كبت المعارضين
حريه الشرطه في اذلال المواطنين سواء مذنبين او مشتكين
حريه امن الدوله في انتهاك حرمات واموال وشركات وكل شخص يقول بم


لقد قال الرئيس كلمته انه وضع خط احمر فاصل لكل من يحاول ان يدمر الاستقرار والامان في هذا البلد الامين

وقد اعطي الرئيس الشرعيه البوليسيه للدوله
وبالطبع سيوافق مجلس الشعب وسيتم تنفيذ القرار طالما هناك اعضاء للحزب الوطني ينفذون ما يطلب منهم دون ادني مناقشه


ايوا اديها كمان شرعيه

بس انا عاتب عليكم مش كنتم تبلغونا انكم مش عايزين المواطين في البلد من بدري شويه كنا ممكن نتصرف في اي سفريه انما مره واحده كده
معتز
12\4\2007
 
posted by معتزعادل at 3:43 AM | Permalink |


0 Comments: