Wednesday, April 25, 2007
!!!!......وجاري البحث عن رونالدينهو
الله الله الله هو ده الريس صاحب اول طلعه جويه فتحت باب الحريه
ايه ده ايه الي انا شايفه ده ده جايب حفيده معاه يا سلام علي لمساتك الانسانيه يا فندم
بصوا يا جماعه الحنان بردوا الرئيس رئيس مقعد حفيده علي رجله زي اي جد عادي يعني

الله الله الله فرحت الاهلي بحضورك يا ريس

والله العظيم مانا الي بقول كده ده المعلق بتاع الماتش بتاع امبارح الي حسسني ان الريس كان بيحارب ورجع من الحرب وان وجود حفيده معاه ده اعجاز وحاجه غريبه جدا

وبعدين هو مين الي ادالوا الصفه علشان يقول ان جماهير الاهلي مبسوطه بحضوره
طيب بالزمه الناس سقفت اكتر لما الرئيس دخل ولا لما رونالدينهو مضي علي الكاميرا

طبعا احنا عارفين فرحم امتي

نيجي ونتخيل بقي الريس وهو مقعد حفيده عمر علي حجره بيقولوا ايه


الرئيس : عمر يا حبيبي ما عدشي في العمر قد الي راح فعايز اوصيك وصيه
عمر: يا جدو الف سلامه عليك متقولش كده
الرئيس : بص يا ابني خد بالك من الي بقولوا يا نظيف بعد ما جمال يمسك الحكم ان شا ءالله عايزكم تودكوا الواد عمر ده شويه علشان يحصل عمه ان شاء الله انا شايف انوا هيكون مثال للحاكم الجيد
عمر : انت تقصد ايه يا جدو
الرئيس : بص يا حبيبي شايف الجماهير الي لابسه احمر دي كلها ؟؟
عمر : اه شايفهم يا جدوا
الرئيس : اهم دول يا حبيبي وقدهم عشر مرات بيشتغلوا عندك خدامينك عايزك تشكمهم
عمر: يعني هي مصر والشعب بتاعنا يا جدو ؟؟
الرئيس : اه يا حبيبي هوريك شجره العيله لما نروح ان شا ءالله مصر دي بتاعتنا من ايام فرعون
عمر: يااااااااااه يا جدو طيب وليه الناس زعلانه اننا نحكم ارضنا
الرئيس : حقد طبقي يا حبيبي بس متقلقش اي حد هيفتح بقوا معاك انت او جمال انا مدي تعليمات للرجاله بتوعي يشوفوا شغلهم
عمر: هتعمل ايه معاه يا جدو هتطردوا بره البلد
الرئيس : اطرده ويطلع يتكلم عليكم بره لا لا لا يا حبيبي احنا هنوديه ورا الشمس
عمر : ايه ده يا جدوا برشلونه جابت جون ...جدو جدو انا عايز فنله رونالدينهو
الرئيس : حاضر يا حبيبي
الرئيس : انت يا كلب يا الي اسمك ن*** سمعت سيدك قال ايه هات الفنله
ن***: بس يا فندم ده لسه بيلعب اطلعوا ازاي من الماتش
الرئيس : اتصرف يا بني ادم الولد عايزها هتعرف تجيبها ولا اجيبها انا بطريقتي
عمر : يا جدو انا عايز رونالدينهو في البيت
الرئيس : حاضر يا حبيبي
ن***: وده اجيبوا ازاي يا فندم
الرئيس : شوف النادي عايز فيه كام وادفعلهم وانا هبني نادي جديد اسموا مباركشلونه ممكن نخليه كابتن الفريق
ن***: يا باشا طالبين فيه 100 مليون يورو
الرئيس : متدفع يا بني ادم
ن***: بس مفيش فلوس في الخزينه يا باشا
الرئيس: احجزوا علي كام واحد من بتوع الاخوان اتصرف هي شغلانه
ن***: قبضنا عليهم كلهم يا باشا وكل فلوسهم اتصرفت علي تجهيز بيت المحروس جمال
الرئيس : طيب بكره تحرير سيناء وانا عايز افرح الشعب نزل عليها ضريبه وجمع الفلوس وهات رونالدينهو للولد انت شايفوا بيعيط
ن***: الشعب مش لاقي ياكل يا باشا
الرئيس : هو كمان الشعب عايز ياكل مش كفايه اننا سايبينوا في البلد يلا يلا بلاش تهريج

انتهي الماتش وتم اختفاء رونالدينهو بمعرفه رجاله الباشا
علشان ملقوش فلوس كفايه يشتروه

وجاري البحث عن رونالدينهو ؟؟؟

معتز

25\4\2007

 
posted by معتزعادل at 11:53 PM | Permalink |


0 Comments: