Tuesday, June 12, 2007
انا لسه راجع من قسم طلخا
انا لسه راجع حالا من قسم طلخا

صليت العصر ورحت اشوف عمر في القسم وخدت معايا واحد صاحبي ملازم اول دخلت القسم وكان قدام الاسم في ناس كتير جدا علشان في حوالي 15 واحد مقبوض عليهم ما بين ناس بتصور وناس تانيه كانت رايحه تنتخب وبيقولوا عليهم بيعملوا شغب . المهم بصراحه حاولت اني اشوفوا او اعرف هما ناويين علي ايه بس محدش كان بيديلي اي معلومات حتي الملازم صاحبي مكنش عارف اي حاجه في اي حاجه ومحدش بيديني معلومات . المهم بعد شويه صاحبي سبني لقيت 2 عساكر بيجروا ورايا واحد خبطني علي دراعي بالعصايا بتاعته فطلعت بره القسم واستخبيت في وسط الناي الي واقفه ومن ساعتها وانا قاعد قدام القسم وبحاول اعرف اي معلومات كل الي عرفته انهم مش هيخرجوا النهارده وفي احتماليه النقل علي معسكر الامن ربنا يستر عليهم جميعا .

جالي في الوقت ده كذا اتصال بيحاول يطمن علي عمر الي اقدر اقولوا ان عمر الوقتي محتاج دعائنا وتضامننا معاه وان اي حاجه تانيه نقدر نعملها يا ريت تبلغونا بيها فورا

كان ممنوع دخول الاهالي او المحامين وموقفين حرس علي القسم ومقفلين الشارع قدامه ولما حاولت اصور الاحداث دي كان في كام امين شرطه متنورين وبيمنعونا من اي حاجه بس ان شاء الله هحاول اوصل لاي صور تفيدنا ان شاء الله

لم نعد نملك سوي الدعاء

اضف توقيعك معنا في حملة جمع التوقيعات للافراج عن عمر الشرقاوي
معتز عادل
من ميدان الأحداث
11\6\2007
 
posted by معتزعادل at 12:39 AM | Permalink |


1 Comments: