انا مخنوق جدا
عنوان رخم صح؟؟
بس بجد الوضع اللي احنا فيه بقي رخم قوي
تخيلوا لما يوصل الامر اننا احس ان مالناش مكان هنا
مش بلدنا دي بتاعتهم
كل حاجة بتقول كده
كل اعتقال جديد بيدل علي كده
كل ضحية تعذيب بتموت من غير عقاب بتأكد علي كده
كل مريض فقير مش لاقي علاج بيقول دي مش بلدنا
كل واحد مش واصلاله المياه
بقول نروح فين
ومن جهة تانية
امن الدولة بيقولنا دي مش بلدكم
وزير الداخلية بيطلع لنا لسانه ويقول دي عزبتي
جمال مبارك بيقول ده ورثي
وابوه بيقول دي ملكي وملك ابني من بعدي
وسوزان بتقول القراءة للجميع (صباح الفل يا مدام ) عايشة في عالم تاني بعيد عن الطفل اللي مات في التعذيب
سلامة الطفولة يا ....ماما
كل يوم معتقل جديد
كل ساعة ضحية جديدة
تخيلوا كل الطحن ده
ورغم كده انا مصر انها بلدي
مش بلدهم
بتاعتي مش بتاعتهم
والله انا ساعات ببقي مشفق علي مصر من اللي بيحصل ده كله
وبقول لو ادينها الفرصة
ياتري هتعمل ايه
تخيلوا معايا
شايفينها وهي بتلم هدومها المتبعترة هنا وهناك
شايفينها وهي بتطبق سيناء وتكويها
وترتب في الشنطة اراضيها
وتحط هدومها الداخلية ..والخارجية
و وزارة البيئة
في الجيب ابو سوستة
وبتعبي النيل في الجركن
وبتلم الصحرا في جلابيتها
ودموعها علينا سبقتها
شايفين النيل بيصرخ
مخنوق مالجركن هيفرقع
مفقوع
زيي وزيك
مجروح من العادلي ورجالته
مقتول من امن الدولة
شايفين خريطة الدنيا
مافيهاش وادي ولا دلتا
وبتقولك مصر اتفقعت
راحت مشوار ومش راجعة
الحمد لله اني بحلم مش صاحي
وسلملي علي الدنيا الواسعة
اسلام العدل
فكرة حلوة يا اسلام .. بس نسيت حاجة مهمة جدا .. ان مصر من الاشخاص الخطرين الممنوعين من السفر تمهيدا لتقليبهم و اعتقالهم .. وللا ايه ؟؟