حصلي النهاردة موقف غريب جدا
النهاردة بعد ما رجعت من بره الساعة 12 كده حصلي ظرف طارئ واضطريت انزل تاني
وارجع الساعة 3ونص الفجر
لقيت تحت بيتنا واقف اكتر من عشرين واحد ومعاهم عربية ربع نقل محافظة
وعربية الدورية
وواقفين علي البوابة
طبعا عملت عبيط وفضلت ماش طوالي ولا كأنه بيتنا
واتقفلت اوي ليه الواحد يتخض لما يشوف ضابط علي الرغم انه المفروض يحس بالامان
ليه لما شوفتهم اتقفلت وحسيت انه جيه دوري او دور حد قريبي تاني
ليه رغم اني مش حرامي ومغرقتش العبارة ولا هربت فلوس بره مصر
ولا بعت اكياس دم مضروبة فضلت ماشي بعيد عن البيت
مين اللي ربي الاحساس ده جوايا
هل هويدا طه هي اللي ربت الاحساس ده جوايا
ولا امن الدولة اللي اصبحت زياراته الفجرية روتين في عائلتي
هل خيرت الشاطر هو اللي علمني اخاف من امن الدولة
ولا اتهامات امن الدولة الباطلة الملفقة
هي اللي خلتني اعتبرهم عدو لازم اهرب منه
نفسي اعرف ازاي اسمهم امن دولة
دول المفروض يبقي اسمهم فزع الدولة
ووانا معدي شفت واحد فيهم ضابط مباحث عارفه
ساكن فوقنا وفرحت اوي لاني اتأكدت انه مش امن دولة
المهم لفيت وعديت من وسطهم وبامانة مرديتش ارمي عليهم السلام
بامانة اكثر استخسرت انهم يخدوا حسنات علي قفايا
وطلعت البيت وطلع الضابط ورايا بيتهم ولسه العربيتين ركنين تحت
ربنا يسلم ويعدي اللية دي علي خير
اسلام العدل
الرابعة الاربع فجر الجمعة
22\7\2007
نحن نعيش فى دوله بولسيه هذا يعنى اننا تحت رحمه البوليس وتدار البلد بسن جزمه ضابط امن دوله انا متفق معاك انهم فزع الدوله وليسو امن دوله دول امن الرئيس شخصيا وليس امنك ولا امنى دول بيحمو الريس فقط الشعب دا اخر شىء يفكرو فيه دا اذا فكرو ولو فكروا فى الشعب يفكروا اذا يهنوه اليس تزوير الانتخابات اهانه للشعب اليس انتكاسه الدستور اهانه للشعب ولو عدينا الاهاهنات مش هانخلص